Правядзенне ў раёне веснавой палявой кампаніі – на сённяшні дзень адно з
галоўных пытанняў, якое турбуе кіраўніцтва раённай выканаўчай улады.
Бо, думаю, не трэба гаварыць пра тое, наколькі важна ў самыя сціслыя
тэрміны і якасна завяршыць сяўбу, наколькі ад гэтага залежыць сёлетні
ўраджай, а значыць, і фінансавы стан сельгасвытворцаў Расоншчыны.Сустракаючыся
з намеснікам старшыні, начальнікам упраўлення сельскай гаспадаркі і
харчавання райвыканкама Сяргеем Мікалаевічам Зінькевічам, я ставіла
перад сабой канкрэтную задачу: пачуць ад яго, а потым расказаць чытачам
раённай газеты пра падрыхтоўку і правядзенне веснавых палявых работ,
пра тыя праблемы, якія паўсталі перад працаўнікамі сяла.
– Сяргей Мікалаевіч, першыя зярняты кінуты ў глебу, а гэта значыць, пасяўная кампанія стартавала і паступова набірае абароты. На Ваш погляд, як яна складзецца для расонскіх хлебаробаў?
– Напружана, хаця лёгкіх веснавых палявых работ, напэўна, не бывае. Бо паспяховае і эфектыўнае раслінаводства залежыць ад многіх складаючых, у тым ліку і ад умоў надвор’я. А яны ў гэтым годзе, мякка кажучы, не вельмі спрыяльныя. Перш за ўсё гэта датычыцца высокай вільготнасці глебы і невялікай колькасці сонечных дзён, якія б дапамаглі падсушыць зямлю.
Але ж мы ўсё роўна не адстаём, а нават апярэджваем леташні графік работ. На сённяшні дзень узарана і пасеяна адпаведна ... і ... гектараў, што складае ... і ... працэнтаў ад запланаванага. Роўна год назад гэтыя паказчыкі складалі ... і ... гектараў.
– Хто з сельгаспрадпрыемстваў першым вывеў на палі сельгастэхніку?
– Сельгаспрадпрыемства «Краснаполле», дзе яшчэ з 6 красавіка пачалі сеяць люпін, бо на Краснапольшчыне больш пясчаная глеба і больш высока размяшчаюцца пасяўныя плошчы. Потым да яго далучыліся «Дворышча-Рас» і «Сяляўшчына». На сённяшні дзень ужо паўсюдна вядуцца работы. Праўда, як правіла, мы імкнёмся выкарыстоўваць лёгкую глебаапрацоўчую тэхніку, такую, як МТЗ-80, МТЗ-30.32, бо цяжкія энерганасычаныя трактары праходзяць з цяжкасцю.
– Вы закранулі тэму тэхнічнага забеспячэння пасяўной кампаніі. Як Вы ацэньваеце яе па ўсяму раёну?
– Скажам так, здавальняюча. Дзякуючы намаганням перш за ўсё старшыні райвыканкама А. М. Шубскага, за мінулы год для сельгаспрадпрыемстваў было набыта звыш 100 адзінак тэхнікі. І вось некалькі дзён назад ужо зроблены першы ўзнос на атрыманне па лізінгу яшчэ 36 адзінак на агульную суму звыш 3,7 мільярда рублёў. Сярод іх 9 трактароў МТЗ-30.22, два«Амкадоры-320», 6 пасяўных агрэгатаў, два падборшчыкі камянёў, 8 – «ПРТ – 7А» і іншае. А гэта значыць, праблема недахопу сельскагаспадарчай тэхнікі будзе стаяць менш востра.
Але ж не значыць, што мы поўнасцю сябе забяспечылі. Яшчэ шмат трэба для таго, каб сказаць з поўнай упэўненасцю: «У нас ёсць для працы ўсё неабходнае». Асабліва адчуваецца недахоп збожжасушыльнай тэхнікі. Таму ўжо цяпер мы плануем пачаць будаўніцтва сушыльнага комплексу ў сельгаспрадпрыемстве «Сяляўшчына».
– Калі ласка, агучце планы, якія рэалізоўваюць хлебаробы ў час сёлетняй пасяўной кампаніі.
– Па-першае, працаўнікам сяла трэба сёлета павялічыць плошчы пад сяўбу яравых збожжавых культур у параўнанні з мінулагоднім на 600 га. Цяпер збожжавымі будзе засеяна 3 855 гектараў. Кукуруза зойме 1 100 гектараў плошчаў, яравы рапс – 200, бульба – 100 гектараў.
Акрамя таго, пад яравую сяўбу трэба ўзараць 1600 гектараў і апрацаваць яе належным чынам. Гэтым відам работы займаюцца ўсе гаспадаркі, акрамя сельгаскааператыва «Клясціцы», працаўнікі якога падрыхтавалі плошчы да веснавой сяўбы яшчэ восенню.
– А як наконт наяўнасці насеннага матэрыялу?
– Для сяўбы запланаваных плошчаў пад яравыя збожжавыя культуры неабходна звыш 860 тон насення. І яно ў нас ёсць у наяўнасці і, што немалаважна, дастаткова высокай 1 – 3 рэпрадукцыі. Цяпер вядзецца яго пратручванне. Няма праблем і з насеннем рапсу і кукурузы. Чаго не хапае, дык гэта насення бульбы. Таму цяпер вырашаем пытанне наконт набыцця недастатковых 70 тон.
– Да якіх яшчэ відаў работ прыступілі ў гаспадарках раёна?
– Паўсюдна вядзецца падкормка азімых, крыжакветных культур, шматгадовых траў, а таксама пашы і сенакосаў. Пад сяўбу ўносяцца мінеральныя, азотныя і калійныя ўгнаенні.
– Яшчэ ў мінулым годзе старшыня Віцебскага аблвыканкама Аляксандр Мікалаевіч Косінец патрабаваў арганізаваць на пасяўной і на жніве работу такім чынам, каб на кожным трактары штодзённа працавалі па два механізатары. Наколькі дадзенае даручэнне будзе выканана на Расоншчыне?
– На жаль, у нашым раёне не хапае механізатарскіх кадраў. Аднак гэта не значыць, што мы не будзем выконваць даручэнне старшыні аблвыканкама. Дзякуючы кадравай падтрымцы шэфаў-прадпрыемстваў, на кожным энерганасычаным трактары будуць працаваць у дзве змены. Выключэнне – сельгаспрадпрыемства «Краснаполле», кіраўніцтва якога разлічвае толькі на ўласныя сілы і ўпэўнена гаворыць пра тое, што трактары і з адным механізатарам будуць працаваць ад цямна да цямна.
– Думаю, што іх праца будзе з годнасцю аплочвацца?
– Безумоўна, той, хто ў час вясенне-палявых работ працуе з душой і на сумленне, будзе і зарабляць неблагія грошы: прыкладна 1,5 – 2 мільёны рублёў.
Акрамя таго, Расонская раённая арганізацыя прафсаюзаў работнікаў аграпрамысловага комплексу аб’явіла раённыя спаборніцтвы на вясенне-палявых работах. Іх пераможцы – трактарысты-машыністы, якія ўспахалі і пасеялі найбольшую колькасць гектараў, атрымаюць каштоўныя падарункі ў памеры 250 тысяч рублёў.
– Дрэнны той гаспадар, хто ўжо вясной не думае пра ўраджай. Колькі, на Вашу думку, сёлета хлебная ніва Расоншчыны дасць збожжа?
– Мы разлічваем атрымаць 14 800 тон збожжа, што на 1 600 тон больш леташняга. А ўраджайнасць павінна скласці не менш 25 цэнтнераў з гектара. Хаця мы разумеем, што гэта не шмат, але ж рэальна ацэньваем уласныя магчымасці.
– І апошняе пытанне. Калі плануеце завяршыць сяўбу?
– Старшынёй абласнога выканаўчага камітэта пастаўлена задача на тэрыторыі Віцебшчыны поўнасцю завяршыць вясенне-палявыя работы да 1мая. Задача складаная, але ж мы зробім усё ад нас залежнае, каб выканаць яе.
Гутарыла Маргарыта АЛЯКСЕЕВА.
Фота аўтара.